Ástrós Rut Sigurðardóttir, frambjóðandi Viðreisnar og fyrrverandi formaður Krafts, og Davíð Örn Hjartarson eiga von á barni. Þetta er annað barn parsins en fyrir á Ástrós eina dóttur og Davíð einn son. Ástrós greindi frá gleðifréttunum á Instagram um helgina.
„Ástin er alls ráðandi þessa dagana. Ég hef svo sannarlega verið bænheyrð með að fá stóra fjölskyldu, Davíð er að melta þetta,“ skrifaði Ástrós.
Ástrós og Davíð eignuðust sitt fyrsta barn saman í apríl á þessu ári og því verður aðeins ár á milli barnanna, en litla viðbótin á að koma í apríl á næsta ári.
Ástrós Rut missti eiginmann sinn Bjarka Má Sigvaldason árið 2019 eftir langa baráttu við krabbamein. Með Bjarka á hún dótturina Emmu Rut. Krabbameinsbarátta Bjarka vakti mikla athygli og fóru þau Ástrós í fjölda viðtala.
Ástrós skipaði svo 5. sæti á lista Viðreisnar í suðvesturkjördæmi í þingkosningum sem fóru fram í september.