Landsliðskonan í fótbolta Sara Björk Gunnarsdóttir og fótboltamaðurinn Árni Vilhjálmsson eru búin að nefna son sinn sem kom í heiminn hinn 16. nóvember. Nýbökuðu foreldrarnir greina frá nafni frumburðarins á Instagram í dag.
„Prinsinn okkar fékk nafnið Ragnar Frank Árnason og er viku gamall í dag,“ skrifa þau bæði og birta einnig tilkynningu á ensku.
Ásamt því að vera fyrirliði íslenska landsliðsins er Sara Björk leikmaður Lyon í Frakklandi. Hún stefnir aftur í atvinnumennsku eftir fæðingarorlof. „Ég hef alltaf verið í líkamlega góðu formi og vonandi mun það hjálpa mér þegar ég sný aftur á knattspyrnuvöllinn,“ sagði Sara Björk í Dagmálum í sumar.