Tónlistarkonan Adele ítrekaði í viðtali við BBC í vikunni að hún gæti vel hugsað sér að eignast börn með kærasta sínum, umboðsmanninum Rich Paul. Þetta er í annað sinn á nokkrum vikum sem söngkonan viðrar áhuga sinn á frekari barneignum í viðtali.
„Ég væri klárlega til í fleiri börn,“ sagði Adele þegar spyrillinn Lauren Laverne spurði hana hvernig hún sæi sjálfa sig fyrir sér eftir tíu ár. „Það væri æðislegt ef við gætum það. Ef ekki, þá á ég Angelo. Ég vil bara vera hamingjusöm,“ sagði söngkonan.
Adele á soninn Angelo, sem er níu ára, með fyrrverandi eiginmanni sínum Simon Konecki. Þau skildu árið 2019. Hún sagði sömuleiðis í hæaðvarpinu hjá BBC að það hafi komið henni á óvart hversu vel það hafi gengið hjá þeim Konecki að ala upp son þeirra saman eftir skilnaðinn.
„Þetta var í raun aldrei mjög flókið því við erum svo góðir vinir. Aldrei í lífi mínu er barnið mitt að fara upplifa klikkaðan skilnað,“ sagði Adele.
Paul á þrjú börn úr fyrra sambandi og sagði Adele að hann hafi eignast börnin sín mjög ungur og að hann þekki vel að ala upp börn með fyrrverandi konu sinni.