Eignaðist óvænt þríbura 46 ára

Hin 46 ára Audrey Tiberius eignaðist nýverið þríbura.
Hin 46 ára Audrey Tiberius eignaðist nýverið þríbura. Ljósmynd/Pexels/Tima Miroshnichenko

Eftir fjölda frjósemismeðferða varð hin 46 ára gamla Audrey Tiberius óvænt þunguð af þríburum. Í mars síðastliðinn tók hún og eiginmaður hennar á móti þremur drengjum, þeim Sky, River og Bay, en þau eiga nú sjö börn saman og eru það allt drengir. 

Tiberius sagði í samtali við KSL News að læknir hefði tjáð henni fyrir nokkrum árum að eggin í henni væru og gömul. Í kjölfarið fór hún í gegnum þrjár frjósemismeðferðir í von um að eignast fleiri börn, en ekkert gerðist. 

Nokkrum árum síðar fengu þau hjónin miklar gleðifregnir um að þríburar væru á leiðinni, en það hafði alltaf verið draumur Tiberius að eiga stóra fjölskyldu. „Ég talaði við tölfræðing og svo virðist sem líkurnar á því að 45 ára einstaklingur eignist þríbura sé einn á móti 20 milljörðum,“ segir Tiberius. 

Frá fæðingu drengjanna þriggja hefur Tiberius eytt um sjö klukkustundum á dag í að dæla brjóstamjólk. Það er því nóg um að vera hjá hjónunum sem halda enn í vonina um að eignast stúlku einn daginn.  

mbl.is