Fjölmiðlakonan Björg Magnúsdóttir og auglýsingahönnuðurinn Tryggvi Þór Hilmarsson gáfu syni sínum nafn um helgina. Sonurinn fékk nafnið Tómas Kári og er sannkallaður eurovisiondrengur.
„Hann heitir Tómas Kári Tryggvason og er óendanlega heppinn með fólkið sitt. Takk fyrir ógleymanlegan dag,“ skrifaði Björg á instagramsíðu sína.
Björg nýtti Eurovision-helgina vel en hún hefur á undanförnum árum verið stödd með íslenska eurovisionhópnum erlendis en í ár var hún í fæðingarorlofi.
„Ég komst að því að ég væri ólétt í miðri Söngvakeppninni í fyrra þannig að litli maðurinn hóf líf sitt í Gufuneshöllinni. Það eru allar líkur á því að hann verði eurovisionaðdáandi – móður sinni til mikillar gleði,“ sagði Björg í viðtali við Morgunblaðið í vetur.
Í byrjun maí var hún spurð hvernig væri að vera heima.
„En lífið er ekkert annað en samansafn tímabila og nú er ég með fimm mánaða gæja sem er að upplifa sitt fyrsta Eurovision og þarf á móður sinni að halda til þess að leiða sig gegnum það. Það er verkefni sem ég mun leggja mig alla í,“ sagði Björg á dögunum spennt að fylgjast með af hliðarlínunni.