Börðu stuðningsmenn Marseille
Til átaka kom á bar í 11 hverfi Parísar í gærkvöldi þar sem stuðningsmenn Marseille höfðu komið saman til að fylgjast með liði sínu keppa við Salzburg í undanúrslitum Evrópudeildarinnar í knattspyrnu.
Eigandi barsins, Chope-Moi, sem er á Boulevard du Temple segir í samtali við Le Parisien að staðurinn hafi verið lagður í rúst.
Framlengja þurfti leiknum og í framlengingu kom til átaka á milli stuðningsmanna Marseille og grímuklæddra manna sem ruddust inn og brutu allt og brömluðu. Þeir flúðu fljótt af vettvangi en samkvæmt upplýsingum frá sjúkraflutningamönnum slösuðust níu gestir lítillega í átökunum.
Marseille tryggði sér sæti í úrslitaleik Evrópudeildarinnar í fótbolta, þrátt fyrir 2:1-tap í framlengingu fyrir RB Salzburg í Austurríki í gærkvöld. Marseille vann einvígið samanlagt 3:2.
Jafnframt kom til átaka á Champs-Elysées breiðgötunni milli stuðningsmanna Marseille og óþekktra einstaklinga.