Með því að vera nokkuð skipulagður og hafa góða yfirsýn er þetta þó yfirstíganlegt. Ferðavefurinn hefur tekið saman nokkur góð ráð sem ættu að létta þér lífið.
Búðu til lista
Þú gerir þér líklega í hugarlund hvað þú ætlar að taka með þér en það er öruggara að skrifa lista yfir það sem þú ætlar að taka með. Með því færðu betri yfirsýn og getur þá tekið ákvörðun um hvort allt á listanum sé nauðsynlegt. Það er hundleiðinlegt að þurfa að ganga frá dóti sem þú ætlar ekki að taka með hvort sem er.
Komdu skipulagi á dótið
Það er upplagt að skipta fatnaði og því dóti sem þú ferðast með upp og setja annaðhvort í poka eða endurnýtanlegar töskur. Til dæmis er gott að hafa nærföt í einni tösku, sokka í annarri og svo snyrtivörur í enn einni. Og já, ekki gleyma að koma skipulagi á allar snúrur og hleðslutæki.
Ilmandi farangur
Stundum getur komið ólykt upp úr töskunni, þá sérstaklega eftir langt ferðalag. Notaðu annaðhvort ilmkort með léttum ilmi eða svokölluð ,,Dryer Sheets”. Alls ekki nota neinn ilm í fljótandi formi, þú gætir endað eins og lifandi pot pourri.
Notist í neyð
Það getur verið ágætisávani að taka alltaf með sér litla sjúkratösku í handfarangur með öllu því helsta eins og til dæmis plástur, verkjatöflur og hælsæraplástur.
Rúllaðu upp
Flestir raða flíkum ofan á hver aðra í ferðatöskuna líkt og um skáp væri að ræða. Það er þó víst betra að rúlla þeim upp áður því það bæði fer betur með flíkurnar og nýtir plássið betur.