„Þetta er bara stórkostlegt“

Þær Magnea Hilmarsdóttir og Heiðrún Hauksdóttir syntu í morgun frá Alcatraz-fangelsiseyjunni utan við San Fransiskó í Bandaríkjunum og í land og urðu fyrstu íslensku konurnar til þess að synda þessa tveggja kílómetra leið á hefðbundnum sundfötum.

„Þetta er bara stórkostlegt. Þetta tók alveg á, og svona á tímabili fannst manni maður ekkert komast áfram, maður var bara svona að skoppa í sjónum, sko. En þetta var stórkostlegt,“ segir Heiðrún í samtali við mbl.is, en sundið tók þær rétt innan við klukkutíma.

Straumarnir báru þær og Steve Walker, bandarískan sundfélaga þeirra, töluvert af leið og var heildarferill þeirra í vatninu um 4,5 kílómetra. „Maður þurfti að hafa sig við til að reka ekki of langt af leið,“ segir Heiðrún.

Frétt af mbl.is

Ætla á sundbolnum frá Alcatraz

„Við erum ótrúlega ánægðar með að þetta hafi tekist, mér sýnist að Magnea sé fyrsta íslenska konan sem að syndir þetta í hefðbundnum sundfötum og ég fylgdi á eftir,“ segir Heiðrún.

Magnea, Heiðrún og Steve á sundi í dag. Golden Gate-brúin í baksýn. Ljósmynd/Aðsend

Þær syntu skriðsund nær alla leið og segir Heiðrún að það hafi á stundum reynst erfitt, en fylgdarfólk þeirra, sem sigldi meðfram þeim, lagði mikla áherslu á að þær myndu synda skriðsund og vildu ekki sjá að þær færu að synda á bakinu.

„Við tókum í mesta lagi 2-3 bringusundstök, þegar við þurfum að komast upp og ná andanum,“ segir Heiðrún, en hún segir að sjórinn hafi verið nokkuð úfinn og því hafi þær þurft að leggja nokkuð á sig til að forðast að gleypa of mikinn sjó.

Erfiðleikar sundsins gleymdust þó fljótt, er þær stöllur stigu hæstánægðar á land.

Allir komnir í land, á sandströnd í San Fransiskó. Ljósmynd/Aðsend

• Blogga um frétt