Teiknimyndasögur eru ekki síður belgískar en bjórinn og súkkulaðið sem landið er svo vel þekkt fyrir, enda eigum við öll Belgíu að þakka meðal annars Strumpana, Lukku-Láka sem ávallt skartar belgísku fánalitunum, Sval og Val, að ógleymdum einum af frægustu vinum Akureyrar, honum Tinna.
Belgískar teiknimyndasögur eru sérstakur flokkur innan teiknimyndasöguhefðarinnar og því stór hluti af menningu Belga. Frá Belgíu koma yfir 700 teiknimyndasöguhöfundar, eða flestir höfundar á ferkílómetra í heiminum. Já, við Íslendingar miðum kannski við höfðatölu en Belgar miða við ferkílómetra. Teiknimyndasöguunnendur allir ættu að sjálfsögðu að leggja leið sína til Brussel þar sem hægt er að fara í sérstakar teiknimyndasögugöngur með leiðsögn, heimsækja teiknimyndasögusöfn og gleyma sér í safnarabúðum.
En af hverju lifa teiknimyndasögur svona góðu lífi í Belgíu? Ein kenningin er sú að þar sem Belgar skiptast í tvo ólíka tungumálahópa, frönsku- og flæmskumælandi, sé teiknimyndasöguformið góð leið til að miðla sögum án þess að tungumálið sé fyrirstaða. Myndræn miðlun er einfaldlega heppilegri og auðveldari. Teiknimyndasögur komu upphaflega frá New York um aldamótin 1900, þar sem fjölmargir innflytjendur bjuggu og töluðu litla ensku, en margir gátu þó lesið einfaldan texta og stuðst við myndir.
Í Brussel eru yfir 60 litrík og lífleg vegglistaverk með þekktum belgískum teiknimyndasögupersónum en í upphafi tíunda áratugarins gerði borgin átak í að lífga upp á ljóta og leiðinlega húsgafla í borginni með þessum stórskemmtilega árangri. Teiknimyndasöguganga er öðruvísi og skemmtileg leið til að upplifa borgina hvort sem þú ert með Tinna húðflúraðan á brjóstkassann eða tókst eina bók um Sval og Val á bókasafninu sem krakki einhvern tímann á síðustu öld.
Teiknimyndaskrúðgangan er stóra áramótasprengjan en hún fer fram í september ár hvert. Skrúðgangan er lokaviðburður vikulangrar teiknimyndahátíðar í Brussel fyrir leikmenn og lærða. Þessi stórskemmtilega og skrautlega skrúðganga með risavöxnum uppblásnum teiknimyndapersónum hlykkjast um borgina við mikinn fögnuð almennings. Ef þú sérð fyrir þér núna hina frægu þakkargjörðarskrúðgöngu Macy's í New York ertu nokkuð nærri lagi.
Snemma morguns byrja yfir 200 sjálfboðaliðar að fylla risavaxnar blöðrurnar og hægt og rólega rétta fígúrurnar úr sér eins og háskólanemar daginn eftir vísindaferð. Uppblásturinn er ekki síður skemmtilegur og vinsæll liður í skrúðgöngunni, en hann stendur yfir í fimm æsispennandi klukkustundir. Þegar allir karakterarnir eru loks orðnir vel belgingslegir hefst skrúðgangan með pompi og prakt.
Þess má geta að Stella býður upp á leiðsöguferðir um borgina á íslensku, sænsku og ensku. Einnig má fylgjast með Stellu á Instagram-síðu hennar.