Justin Theroux elskar Tókýó

Leikarinn Justin Theroux er mikill stórborgarkall. Hann segir New York vera fyrstu ástina sína en er einnig mjög hrifinn af Tókýó. Finnst honum hann alltaf vera í stuttan tíma í Tókýó og sagði í viðtali við GQ að borgin taki sífelldum breytingum. 

Margir eiga sínar uppáhaldsborgir og sína uppáhaldsstaði í borgunum. Þegar Theroux hugsar hins vegar um Tókýó er ástæðan allt önnur. 

„Það er alltaf eins og það sé ekki nægur tími í Tókýó. Ástæðan fyrir því að þú kemur alltaf aftur er sú að það er erfitt að átta sig á staðnum. Tókýó er lífvera sem heldur áfram að stækka og þróast,“ segir leikarinn. „Staðir sem voru þar fyrir þremur árum eru ekki til lengur en núna hefur eitthvað komið í staðinn. Staðir sem voru þar fyrir tíu árum eru pottþétt ekki til en þú átt góða minningu frá þeim.“

Leikarinn segir borgina vera rökrétta. Þegar fólk er kvefað notar það grímu í stað þess að heilsa öðru fólki með faðmlagi eins og gert er víða. Hann segir fólk í Tókýó einnig mjög kurteist. Leikarinn er lítið fyrir að taka í hendurnar á fólki og vill frekar hneigja sig. Hann segir einnig órökrétt að vera allaf að snerta annað fólk. Í 7-Eleven-búðum eru myndir á gólfinu svo fólk fari í rétta röð. Hann er ánægður með allar reglurnar og ef fólk fer eftir þeim er það eins og lauf í vindi í Tókýó. 

Theroux er líka ánægður með að það er ekki hávær tónlist á veitingastöðum. Segir hann fólk tala saman á mýkri hátt í staðinn. 

„Þú getur í alvöru slakað á í Tókýó á meðan ég held að þú getir það ekki í New York af því að það er svo lítið pláss og fólk tekur svo lítið tillit til hvert annars.“

New York-búinn Theroux segir reyndar erfitt að fljúga frá New York til Tókýó vegna tímamismunarins. Til þess að bæta líðan sína reynir hann að borða áður en hann fer í flug og sofa eins mikið og hann getur. Hann horfir frekar á teiknimyndir og sofnar yfir þeim í stað spennandi bíómynda. Fyrsti dagurinn er oftast erfiður þegar flugþreyta er annars vegar en svo jafnar hann sig. 

• Blogga um frétt