Aðeins nokkrum sekúndum munaði að sjö manna fjölskylda yrði fyrir lest í Pennsylvaniu-ríki í Bandaríkjunum á dögunum. Fjölskyldan var að taka myndir og leika sér á lestarteinunum og hafði aðeins nokkrar sekúndur til að hlaupa í burtu þegar þau urðu vör við lestina.
Atvikið náðist á öryggismyndavél og hefur verið hlaðið upp á netinu til að vara aðra við að fara út á lestarteina. Á myndbandinu sést að fjölskyldan hafði aðeins 15 sekúndur til að forða sér eftir að þau urðu vör við lestina.
Fjölskyldan sést eyða nokkrum mínútum á teinunum að leika sér en yngsta barnið virðist aðeins vera nokkurra ára gamalt. Eitt eldri barnanna þarf seinna að hlaupa yfir teinana til að bjarga því þegar lestin nálgast óðfluga.