Sofðu við hlið fíla í Taílandi

Gistu í frumskógum Taílands með fílum.
Gistu í frumskógum Taílands með fílum. Skjáskot/Instagram

Fílar eru einstaklega áhugaverð dýr, sérstaklega í sínu náttúrulega umhverfi. Í Anantara Golden Triangle Elephant Camp í Taílandi er hægt að fylgjast með fílum allan sólarhringinn og jafnvel gista við hlið þeirra. 

Á svæðinu eru tvær gegnsæjar kúlur sem ferðamenn geta bókað yfir nótt. Þær eru staðsettar inni á svæði þar sem þrír fílar búa. Gestir geta dvalið í kúlunum og fylgst með fílunum við leik og störf. 

Nálægt kúlunum eru allskonar „leikföng“ sem fílarnir sækja í. Þeir eyða þó mestum tíma sólarhringsins í að borða. Fílar eru stórir og ekki hljóðlát dýr, það gæti því verið að ekki mikill svefnfriður sé fyrir þeim. 

Nóttin í kúlunum er ekki ódýr, en hún kostar 17.700 baht eða um 75 þúsund íslenskar krónur fyrir tvo. Upplifunin er þó eflaust hverrar krónu virði enda ekki á hverjum degi sem maður fær að fylgjast með fílum óáreittum í frumskóginum.

Ekki er leyfilegt að fara út úr kúlunum á meðan dvölinni stendur og ekki er leyfilegt að gefa þeim að borða. 

mbl.is