The Marvelous Mrs. Maisel-leikkonan Rachel Brosnahan ferðast ekki mikið þessa dagana en getur eins og svo margir aðrir hlýjað sér við góðar ferðaminningar. Brosnahan sagði frá uppáhaldsstöðum sínum í heiminum í viðtali við ferðatímaritið Condé Nast Traveller.
París
Leikkonan hefur unnið í París og á vini sem búa þar. Hún segir borgina í miklu uppáhaldi og þá sérstaklega listasafnið Louvre. Einn af hennar uppáhaldsstöðum í borginni er vínbar sem heitir Milord en hún fór þangað fyrst þegar hún bað vini sína að fara á stað sem bara heimamenn þekktu.
England
Móðir Brosnahan er ensk svo hún ber sterkar taugar til Englands og langar til að vera meira þar. Amma hennar og afi bjuggu í Beaconsfield og fór hún mikið þegar hún var yngri í Bekonscot sem er garður með litlum módelbyggingum.
Prag
Brosnahan segir jólamarkaðina í Prag dásamlega. Hún mælir einnig sérstaklega með veitingastaðnum Kolkovna Olympia í borginni.
Vancouver
Leikkonan er hrifin af borginni en þar getur hún farið í fjallgöngur og fengið sér sundsprett á sumrin.
Ten Thousand Waves í Santa Fe í Nýja-Mexíkó
Brosnahan mælir sérstaklega mikið með heilsulindinni Ten Thousand Waves sem er í japönskum stíl. Hægt er að gista og starfsfólkið færir gestum bláber, heimagert múslí og möndlumjólk á morgnana. Að sjálfsögðu er gott spa og góður veitingastaður. Leikkonan segir að staðurinn sé í uppáhaldi þegar hún þarf að komast í burtu en það er ekkert símasamband á staðnum.