Kidman nýtir tímann og lærir ítölsku

Ástralska leikkonan Nicole Kidman elskar Ítalíu. Þegar ekki er hægt að ferðast er hægt að fara hálfa leið með huganum en það gerir Kidman með því að læra ítölsku. Hún hefur komið sér upp lærdómsaðstöðu og reynir nú að læra ítölsku með hjálp kennslubóka. 

Kidman segir á Instagram að það sem gefi henni von er ítalska orðtakið „Andrà tutto bene“ en það þýðir á íslensku: „Það verður allt í lagi.“

„Ég hef verið að læra ítölsku sem hefur veitt mér von, huggun og afþreyingu. Ég hef alltaf elskað Ítalíu en að geta enduruppgötvað tungumálið hefur verið svo mikil blessun fyrir mig,“ skrifaði Kidman á Instagram og mælir auk þess með aríunni Nessun Dorma úr óperunni Turandot. 

Leikkonan og eiginmaður hennar, tónlistarmaðurinn Keith Urban, geta undir venjulegum kringumstæðum ferðast hvert sem er í heiminum. Ítalía verður oft fyrir valinu og síðasta haust birti til dæmis Urban mynd af þeim hjónum í Flórens. 

Það þykir bæta upplifun ferðamanna að tala tungumál heimamanna og næst þegar Kidman heimsækir Ítalíu á hún líklega eftir að geta talað tungumálið enn betur en áður. 

• Blogga um frétt