Skemmtigarðurinn Disney World í Flórída opnar aftur um helgina eftir að hafa lokað vegna kórónuveirunnar. Það vekur nokkra athygli þar sem veiran er ekki talin vera í rénun í Flórída heldur þvert á móti.
Strangar reglur gilda um komu gesta í garðinn. Öll börn eldri en tveggja ára þurfa að vera með grímur á andlitinu öllum stundum. Þá verður hitinn mældur við innganginn auk þess sem ítrasta hreinlætis verður gætt.
Leikararnir í garðinum þurfa einnig að taka á sig aukna ábyrgð. Þeir þurfa að hitamæla sig fyrir hverja vakt og vera á varðbergi gagnvart hvers konar einkennum. Þá þurfa þeir að halda sig heima ef þeir eru veikir.