Flest börn dreymir eflaust einhvern tímann um að eiga tréhús í garðinum sínum. Þótt maður sé vaxinn úr grasi er ekkert að því að láta sig dreyma um að dvelja að minnsta kosti eina nótt í tréhúsi.
Ferðavefurinn tók saman nokkur tréhús sem þú getur leigt á Airbnb þegar heimsfaraldurinn verður genginn yfir.
Þetta tréhús í Bretlandi lætur æskudrauma þína um tréhús rætast á einni nóttu. Þar að auki er húsið smíðað úr endurunnum við.
Tréhús þurfa ekki að vera einhverjir illa farnir kofar uppi í tré. Þau geta líka verið algjör lúxus eins og þetta hús í Worston í Bretlandi.
Þetta tréhús er ansi rómantískt og fallegt. Hvað er rómantískara en ítölsk sveit?
Ef þú ert á annað borð kominn til Havaí, af hverju þá ekki að splæsa í eina nótt í tréhúsi í regnskóginum? Þetta hús er byggt úr bambus og fullkominn staður til að taka sér frí frá túristalífinu.
Þetta hús í sveitinni í Suður-Frakklandi er draumi líkast. Í því eru bæði venjuleg rúm og hengirúm og á svölunum eru rólur.
Ef þú ert kominn með nóg af hávaðanum og fólksfjöldanum í borginni er þetta tréhús í skóginum í Georgíu hið fullkomna afdrep.