Flúði appelsínugula viðvörun

Hrönn Sveinsdóttir framkvæmdastjóri Bíó Paradís átti óvenjulegt sumar fyrir margra hluta sakir. Vinnan tók yfir og hún rétt náði einni sumarbústaðarferð og einni útilegu. Hún telur að kórónuveiru-faraldurinn hafi kennt okkur öllum að meta betur hluti á borð við samveru og viðburði og hlakkar til að bjóða almenning aftur velkominn í Bíó Paradís eftir miklar endurbætur.

Hvernig var sumarið hjá þér?

„Þetta sumar var óvenjulegt því þetta er fyrsta sumarið í 14 ár sem við eiginmaður minn og fjölskylda förum ekki í bústaðinn okkar við Michigan vatn. Svo það var undarlegt og við söknuðum þess mikið. En svo voru aðrir óvenjulegir hlutir í gangi, ég ætlaði að taka mér gott frí og skoða landið rækilega en framkvæmdir í Bíó Paradís tóku fljótt yfir öll okkar plön og við rétt náðum einni sumarbústaðarferð og einni útilegu en annars kallaði skyldan á mig í Paradís og ég var á haus þar í allt sumar.“

Ferðaðistu eitthvað um landið?

„Planið hjá okkur var að fara norður og austur í útilegu í kringum afmælið mitt, því mér finnst svo gaman að vera úti í náttúrunni og vil helst vera með bál og mikið vesen í kringum mig þegar ég á afmæli. Það gekk nú ekki betur en svo en það var gefin út appelsínugul viðvörun á þessum tíma fyrir þennan landshluta svo við flúðum á suðurland þar sem við brölluðum mikið og fórum á gamla uppáhaldsstaði þessa viku sem við vorum á ferðinni. För var svo heitið á heimildamyndahátíðina Skjaldborg á Patreksfirði sem er mín uppáhalds kvikmyndahátíð en hún var snögglega blásin af vegna annarrar COVID bylgju sem þá reið yfir um Verslunarmannahelgi.“

Hvað kom þér mest á óvart í sumarfríinu í sumar?

„Það var rólegra en ég hélt á þessum helstu ferðamannastöðum og sumir voru hreinlega lokaðir. Ég hélt að það yrði allt stappað af sturluðum Íslendingum á ferð, en það var ekki svo mikið af þeim. Svo kom það mér á óvart hvað gekk vel að ganga á fjöll með börnunum mínum eftir að ég sagði þeim að það væru morðkindur í öræfasveit. Ég hef lesið um villifé á þessum slóðum svo þetta er kannski engin lýgi en þær voru mjög fljótar að greikka sporið í hvert skipti sem við sáum kind. Hverjir eru þínir uppáhaldsstaðir? Ég elska Snæfellsnesið og Breiðafjörðinn, Vestfirði, Mývatn og Dimmuborgir og Ásbyrgi. Ég hef örsjaldan komið á hálendið en það er alveg einstakt og ég myndi vilja gera meira af því.“

Gerðir þú eitthvað í sumar sem þig langar ekki að gera aftur?

„Já. Ég komst ekki í nógu mörg ferðalög og var þess í stað alltof mikið að hamast í vinnunni. Mér finnst það ekki gott sumarplan og mun reyna að forðast það í framtíðinni.“

Hvað er framundan?

„Mjög spennandi tímar því nú sér fyrir endann á framkvæmdunum og við getum farið að bjóða almenning aftur velkominn í stórkostlega og endurbætta Bíó Paradís! Hvernig leggst veturinn í þig? Hann leggst bara vel í mig þrátt fyrir áskoranir sem heimsfaraldurinn hefur í för með sér. Ég held við kunnum öll betur að meta þetta venjulega, viðburði, félagsskap og samveru. Ég held við séum öll tilbúin að leggja meira á okkur fyrir gæðastundir og erum þakklátari fyrir allt það góða í lífinu.“

Dóttir Hrannar að njóta náttúrunnar. Ljósmynd/Aðsend

Fjölskyldan í útilegu. Ljósmynd/Aðsend

• Blogga um frétt