Lengsta flugferð í heimi, frá Singapúr til New York í Bandaríkjunum, er aftur í boði eftir að hafa verið tekin tímabundin úr leiðakerfi Singapore Airlines í kórónuveiruheimsfaraldrinum.
Rúmar 18 klukkustundir tekur að fljúga á milli Singapúr og New York-borgar og eru flognir yfir 15.343,49 kílómetrar. Reyndar hefur leiðin lengst um 24 kílómetra frá því mars, því nú er lent á JFK-flugvelli en ekki Newark í New Jersey.
Gert er ráð fyrir að farið verði í loftið 9. nóvember næstkomandi og að flogið verði þrisvar í viku.
Breytingin á flugvöllunum er að sögn talsmanns Singapore Airlines til að koma betur til móts við farþega og vöruflutningafyrirtæki.
Færri farþegar verða um borð en í venjulegu árferði og því meira pláss fyrir vörur.
Óljóst er hversu mikil eftirspurn er eftir ferðum á milli New York og Singapúr eins og staðan er í dag. Íbúar Singapúr mega koma inn í landið, sem og farþegar með vegabréfsáritun og ferðamenn frá Ástralíu, Brúnei, Nýja-Sjálandi og Víetnam.