Stjörnuparið Alex Rodriguez og Jennifer Lopez fór með einkaþotu frá New York til Miami á dögunum. Hafnaboltakappinn fyrrverandi birti mynd af sér og tilvonandi spúsu sinni á instagram og hefur myndin fengið misjafnar móttökur.
Sumum þykir myndin smekklaus í ljósi kórónuveirufaraldursins og efnahagsþrenginga í kjölfar faraldursins. Söng- og leikkonan virðist láta áhyggjur annarra sig lítið varða á myndinni þar sem hún liggur í einkaþotunni á teppi frá Hermes.
„Við höfum svo mikið fyrir að vera þakklát fyrir og erum spennt að vera á leiðinni heim til að verja tíma með fjölskyldunni,“ skrifaði Rodriguez meðal annars og spurði um plön fólks fyrir þakkargjörðarhátíðina sem er í dag, fimmtudag.
Í stað þess að segja frá skemmtilegum plönum sínum nýttu sumir tækifærið og vöktu athygli á að fólk hefði misst vinnuna og bentu á að þau þyrftu ekki að sýna hversu mikla peninga þau ættu með því að birta mynd úr einkaþotunni.