Í netflixþáttunum Krúnunni fór Díana prinsessa án Karls Bretaprins til New York. Þegar Díana heimsótti New York-borg gisti hún iðulega á Carlyle-hótelinu á horni Madison-breiðgötu og 76. stræti. Bara ef veggirnir gætu talað gæti einhver sagt enda voru stórstjörnur daglegir gestir á hótelinu.
Hótelið er 70 ára gamalt og í grein á vef New York Times um sölu þess í sumar kemur fram að hótelið hafi gegnt hlutverki Hvíta húss Johns F. Kennedys fyrrverandi Bandaríkjaforseta þegar hann var í borginni. Díana prinsessa fékk einnig að vera í friði á hótelinu þegar hún dvaldi í borginni.
Aðrir Bandaríkjaforsetar hafa einnig heimsótt hótelið sem og kóngafólk víða að úr Evrópu. Vilhjálmur Bretaprins og Katrín hertogaynja hafa meðal annars dvalið þar. Fleiri fróðleiksmola er að finna á vef hótelsins. Þar kemur meðal annars fram að fyrrverandi forsetafrúin Jacqueline Kennedy Onassis og leikkonan Audrey Hepburn hafi fyrst hist á hótelinu. Fatahönnuðurinn Huberd de Givency átti íbúð á hótelinu og varð íbúðin ekki hluti af því fyrr en árið 2017.