Raunveruleikastjarnan Kris Jenner og dætur hennar Kylie og Kendall Jenner fögnuðu komu nýs árs í skíðaferðalagi í Aspen í Colorado í Bandaríkjunum. Fjölskyldan leigði rándýra villu í skíðabænum en það kostar rúmlega 57 milljónir íslenskra króna að leigja villuna á mánuði.
Villan er rúmlega 1.800 fermetrar og á fjórum hæðum. Í henni eru sjö svefnherbergi, níu baðherbergi, risastór verönd, arinn, heimabíó, sundlaug, keilusalur og bílskúr fyrir fjóra bíla. Villan er glæný en hún var byggð á síðasta ári.
Fjölskyldan leigði húsið aðeins í nokkra daga svo ólíklegt þykir að þau hafi greitt 57 milljónir. Húsið stendur á afskekktum stað í Klettafjöllunum og því gott næði fyrir stórstjörnurnar.
Kris Jenner sneri aftur heim til Los Angeles um miðjan dag í gær, en dætur hennar tvær, og Stormi dóttir Kylie, dvöldu fram á kvöld í Aspen. Þær flugu svo aftur til Los Angeles í einkaþotu Jenner.