Ítalir tækla ferðamannafjöldann

Ítalía hefur undanfarin ár glímt við að of margir ferðamenn heimsækja sömu staðina í of miklum mæli. Það var vissulega ekki vandamál á síðasta ári vegna heimsfaraldursins, og ólíklegt þykir að það verði vandamál í ár. En hvað gerist þegar heimsfaraldurinum lýkur?

Á háannatíma í Flórens heimsóttu yfir 12 þúsund manns borgina á einum degi. Tóku myndir af sér með öllum helstu kennileitum, biðu í röðum fyrir utan söfn og borðuðu á veitingastöðum. Of mikill fjöldi ferðamanna var raunverulegt vandamál í borginni, svo mikið vandamál að yfirvöld fóru af stað með herferðina Enjoy Respect Florence til þess að hvetja ferðamenn til að haga sér vel. 

Mörg af fegurstu listaverkum heims er að finna á Uffizi safninu. mbl.is/pixabay

Flórensbúar hafa hins vegar nýtt tímann í heimsfaraldrinum vel og fara nú af stað með Uffizi Diffusi-verkefnið. Einn af þeim sem standa að baki verkefninu er stjórnandi Uffizi-listasafnsins, Eike Schmidt. 

Verkefnið felur í sér að reyna að dreifa ferðamönnum á sem besta vegu um borgina. Schmidt fékk hugmyndina þegar hann var lokaður inni í útgöngubanni og vann á lokuðu safninu. Þá fór hann að skoða safnkostinn betur og datt í hug að dreifa honum frekar víðsvegar um borgina. 

Á teikniborðinu er að færa listaverkin á 60 til 100 staði í borginni og dreifa þar með ferðamönnunum sem bíða í löngum röðum eftir að njóta listarinnar á safninu. 

Heimamenn í Flórens hafa tekið vel í verkefnið og hafa margir atvinnurekendur og óbreyttir borgarbúar boðist til að taka þátt í því. Gert er ráð fyrir að verkefnið hefjist strax í sumar en listaverk safnsins eru yfir 3.000 svo nóg er til af verkum til að dreifa um borgina.

CNN Travel

Flórens. AFP

• Blogga um frétt