Veitingahúsið Salka á Húsavík hefur komið upp rauðum dregli fyrir framan dyr sínar. Mikið stuð er fram undan á Húsavík um helgina vegna Óskarsverðlaunahátíðarinnar sem fer fram aðfaranótt mánudags.
Lagið Húsavík – My Home Town er tilnefnt til verðlaunanna og mikil stemning hefur myndast í bænum vegna tilnefningarinnar.
Á Sölku var kynntur sérstakur Óskarsmatseðill með amerísku ívafi og þar má til dæmis finna Hollywood hotwings, Óskarsrif og sitthvað fleira.
Rauði dregill Sölku er ekki sá eini í bænum en Garðarsbrautin hefur verið máluð rauð og borði hengdur milli húsanna í tilefni af verðlaunahátíðinni.