Milljónir kínverskra ferðamanna ferðuðust innanlands um liðna helgi. Baráttan við veiruna hefur gengið vel í Kína og eru íbúar fegnir frelsinu.
Götur höfuðborgarinnar Beijing fylltust af ferðamönnum með myndavélar. Í Shanghai mátti sjá fjölda ferðamanna draga ferðatöskur á hjólum og taka sjálfur af sér. Í Wuhan, þar sem veiran greindist fyrst, mátti sjá fólk dansa án andlitsgrímu úti á götu á Strawberry-tónlistarhátíðinni.
Vel hefur gengið að hafa stjórn á faraldrinum í Kína undanfarna mánuði og greindust aðeins 17 smit í gær, þriðjudag, og voru það allt landamærasmit og því öll í sóttkví.
Takmarkanir á ferðalögum til annarra landa eru þó enn í gildi og landamærin hálflokuð. Kínverjar nýta þó tækifærið til að ferðast innanlands. Samkvæmt bókunarvefnum Ctrip var búist við því að um 200 milljónir myndu ferðast innanlands á fimm dögum.
Kínversk stjórnvöld fara þó að öllu með gát og hvetja vinsæla ferðamannastaði til að setja fjöldatakmarkanir og halda skrá yfir þá sem heimsækja staðinn.