Lúxuslestarferðir fyrir ferðaþyrsta

Að fara í lest þarf ekki aðeins að vera hagkvæm og góð leið til þess að komast á milli staða. Hægt er að taka lestarferðina í aðrar hæðir og gera hana að upplifun út af fyrir sig.

Ferðaþjónustufyrirtækið Luxury Train Club býður upp á lúxuslestarferðir í vel útbúnum lestum sem minna á gamla tíma. Hægt er að ferðast um framandi slóðir Afríku, Suður-Ameríku og Evrópu í fádæma fallegum lestum. Möguleikarnir og útfærslur ferðalaganna eru allt að því óteljandi.

Takturinn er öllu hægari í gömlu lestunum en við eigum að venjast. Í lestinni El Transcantabrico Gran Lujo er til dæmis hægt að ferðast um spænsku sveitina. Lagt er af stað frá Santiago de Compostela og farið norður til San Sebastian. Lestin er á ferð á daginn en á kvöldin er hægt að njóta matar á fínum veitingastöðum þar sem stoppað er hverju sinni. Þá er góður nætursvefn tryggður þar sem lestin er ekki á ferð á nóttunni.