Við fjölskyldan skelltum okkur inn í Þórsmörk með góðum vinum um Jónsmessuhelgina enda var veðurspáin einstaklega góð á þessum friðsæla stað á Suðurlandi.

Fyrir þá sem ekki vita dregur Þórsmörk nafn sitt af þrumuguðinum Þór úr norrænni goðafræði en í Landnámabók segir að Ásbjörn Reyrketilsson hafi numið land í Þórsmörk og helgað landnám sitt þrumuguðinum.

Þórsmörk er við suðurströndina á milli tveggja jökla, Eyjafjallajökuls og Mýrdalsjökuls, en veðurfarið þar er einstaklega gott oft á tíðum vegna hárra fjalla sem umkringja svæðið og vernda það þannig fyrir úrkomuskýjum.

Á laugardeginum hjóluðum við frá Básum yfir í Langadal og þaðan upp hrygginn við Slyppugil. Þaðan lá leiðin niður í átt að Hamraskógum og var svo endað í Húsadal áður en við hjóluðum aftur til baka inn í Bása.

Á sunnudeginum gengum við svo upp frá Básum og hringinn í kringum Vestrahatt sem er 509 metrar að hæð. Yngri kynslóðin fór létt með gönguna og því auðvelt að mæla með þessum hring fyrir fjölskyldufólk.

Það var stuttbuxnaveður í Mörkinni alla helgina sem fór einstaklega vel í þá yngstu sem nýttu tímann vel í að busla í lækjum, kasta steinum í Krossá og veiða síli.

Smelltu hér til að fylgja mér á Instagram.