Tískuáhugafólk sem ferðast til New York á von á góðu en ný sýning um franska tískuhúsið Dior var opnuð í september í listasafninu í Brooklyn. Sýningin hefur áður hlotið góðar viðtökur á Englandi og í Frakklandi en er nú til sýnis í Bandaríkjunum með bandarískum áhrifum. Sýningin ber yfirskriftina Christian Dior: Designer of Dreams eða Christian Dior: Hönnuður drauma. 

Viðbúið er að Banda­rík­in opni á ferðalög bólu­settra Breta og Evr­ópu­búa inn­an nokk­urra vikna, en lokað hef­ur verið á ferðalög til Banda­ríkj­anna í um 18 mánuði vegna heims­far­ald­urs kór­ónu­veirunn­ar. Það gefur Íslendingum á leiðinni til New York ágætis tíma til þess að skoða sýninguna en hún stendur yfir til 20. febrúar á næsta ári. 

Á sýningunni er að finna yfir 300 hátískukjóla ásamt myndum, myndskeiðum og teikningum. Gott yfirlit yfir 75 ára sögu tískumerkisins. Christian Dior var frumkvöðull í að flytja tísku út og opnaði sína fyrstu búð í New York 1948, aðeins ári eftir að merkið var stofnað. Seinna voru opnaðar búðir í Suður-Ameríku, um alla Evrópu, í Norður-Afríku og Japan.

Sýningin sem var opnuð nýverið í New York var fyrst opnuð í París og Lundúnum 2017 og 2019. Var vel við hæfi að opna sýninguna í sömu viku og tískuvikan í New York fór fram. Á sýningunni eru meðal annars kjólar sem Grace Kelly klæddist og Jennifer Lawrence.