Harry Bretaprins og Meghan hertogaynja af Sussex flugu frá New York á austurströnd Bandaríkjanna til Los Angeles á vesturströndinni á einkaþotu. Hjónin voru stödd í New York til að koma fram á Global Citizen Live og töluðu þar fyrir aðgerðum gegn loftslagsbreytingum.
Hjónin sáust á flugvellinum í Santa Barbara á laugardagskvöld eftir að einkaþota þeirra var nýlega lent.
Mörgum þykir það skjóta skökku við að tala fyrir aðgerðum gegn loftslagsbreytingum opinberlega á sama tíma og þau nota einkaþotur í sínu einkalífi. Hjónin hafa verið harðlega gagnrýnd á samfélagsmiðlum og kölluð hræsnarar.
Þetta er ekki í fyrsta skipti sem þau fljúga á einkaþotu, og ekki í fyrsta skipti sem þau hafa verið gagnrýnd fyrir það. Fyrr í haust flaug Harry meðal annars til Coloradoríkis á einkaþotu.