Hörður Hilmarsson, forstöðumaður íþróttadeilda Úrval Útsýn, segir að vel gangi að selja miða í ferð á leik Íslands gegn Danmörku sem fer fram í Búdapest annað kvöld. Ferðin var skipulögð með gríðarlega stuttum fyrirvara en fyrir lá að Ísland kæmist í milliriðlakeppni EM í gærkvöldi. 

„Við hefðum viljað hafa einn dag í viðbót til að skipuleggja ferðina en þetta hefur gengið vel. Við byrjuðum strax í gærkvöldi og unnum til miðnættis. Síðan byrjuðum við aftur klukkan sex í morgun,“ segir Hörður í samtali við mbl.is.

„Það er ýmislegt sem þarf að ganga upp þegar svona ferðir eru skipulagðar, við þurftum fyrst að tryggja að vélin sem við höfum notað í leiguflug væri tiltæk. Síðan þurfti að tryggja hótel og það lá fyrir í morgun,“ segir Hörður. 

Hörður hefur sjálfur fylgst grannt með leikjum Íslands á Evrópumeistaramótinu og hlakkar til að horfa á leikinn annað kvöld.

Innifalið í ferðinni er flug, rúta á leikinn, miði á leikinn, ein nótt á fjögurra stjörnu hóteli með morgunverði og rúta á flugvöllinn. Nánari upplýsingar má finna á vef Úrval Útsýnar. 

Tengdar fréttir

Stemning á EM í handbolta

Ákvað að svara Hreiðari á skjánum

• Danir fjalla um reiði Íslendinga
• 23 milljónir horft á Sigvalda skrúfa boltann í netið
• Færri komu heim en fóru út
• Rífandi stemning á barnum í Búdapest

» Fleiri tengdar fréttir

• Blogga um frétt