Hjónakornin ungu Brooklyn og Nicola Peltz-Beckham njóta nú hveitibrauðsdaganna í St Tropez. Þar væsir ekki um parið.
Brooklyn sem er 23 ára hefur verið duglegur að birta myndir á samfélagsmiðlum af hinum ýmsu kræsingum sem lagt er á borð fyrir þau en vitað er að hann er mikill áhugamaður um mat. Þá hefur hann einnig birt myndir af hágæða víni en flaskan er talin kosta um hálfa milljón íslenskra króna.
Parið er sagt vera afar ástfangið og eru þau dugleg að leiðast um götur borgarinnar og kyssast og knúsast á hverju götuhorni.
Beckham hefur landað ýmsum auglýsingasamningum undanfarið sem ýtir undir fjárhagslegt sjálfstæði hans. Margir hafa þó bent á að það sé lítið sem bendi til þess að hann hafi fundið köllun sína í lífinu, eitthvað sem veiti honum fyllingu og sé góður í.
Beckham hefur reynt fyrir sér sem ljósmyndari og gaf út bók með ljósmyndum sínum sem bar heitið What I See. Þar var til að mynda mynd af fíl í skugga og við myndina stóð: „Svo erfitt að mynda en ótrúlegt að sjá“. Við aðra óskýra mynd stóð: „Mér líkar þessi mynd, hún er úr fókus en svo ótrúlega margt að gerast á henni.“
Nýlega hefur Beckham verið að reyna fyrir sér sem kokkur og gerði nokkra þætti fyrir samfélagsmiðla. Þar lætur hann ýmsa gullmola flakka eins og til dæmis: „Ég elska ost, hann er eins og smjör.“ Gagnrýnendur hafa líkt hæfileikum hans í eldhúsinu við sönghæfileika móður sinnar. Aðrir hafa bent á hversu erfitt það sé fyrir börn frægra að finna sinn stað í lífinu því það má ekkert út af fara. Allir séu tilbúnir til þess að gagnrýna þau.