Ferðalög | Ferðalög innanlands | mbl | 28.7.2022 | 20:00 | Uppfært 21:41

Besta minningin blysin í Herjólfsdal

Kristín Lea Ljósmynd/Instagram

Leikkonan og flugfreyjan Kristín Lea Sigríðardóttir hefur í nægu að snúast í sumar. Hún flýgur landa á milli um loftin blá og þess á milli nær hún að njóta með fjölskyldunni. Hún er mikið fyrir útilegur, veiði og sólarferðir.

Hvert ertu búin að ferðast í sumar?

„Ég er búin að ferðast voðalega lítið í sumar það sem komið er. Í sumarfríinu smíðuðum við pall og ég ferðaðist rosa mikið þar.“

Hvað hefur staðið upp úr í sumar?

„Við fjölskyldan erum stödd í Málaga núna í dásamlegu fríi. Erum í litlum bæ sem heitir Benalmadena. Þessi ferð stendur klárlega upp úr í sumar. Svo er önnur Spánarferð plönuð í ágúst með vinkonum mínum.“

Hvernig ferðalögum hefur þú gaman af?

„Það má segja að ég hallist að sólarferðum en ég er líka mjög hrifin af íslenskum útilegum. Við maðurinn minn ætlum að vera dugleg að skjótast í veiði í sumar og haust. Höfum gert eitthvað af því í sumar og koma strákunum okkar í þá líka.“

Hvað ætlarðu að gera um verslunarmannahelgina?

„Ég verð að vinna þessa verslunarmannahelgina í háloftunum ný búin að fylla á ferðabankann með fjölskyldunni.“

Hver er besta verslunarmannahelgar minningin þín?

„Besta verslunarmannahelgar minningin mín er sennilega þegar ég fór til Eyja í fyrsta skiptið og upplifði brekkusönginn og blysin í klessu í brekkunni með mínum bestu vinkonum. Einstök tilfinning. Svo minnir mig að það hafi verið verslunarmannahelgi þegar við maðurinn minn fórum í fyrstu útileguna okkar nýbyrjuð saman bara eitthvað út á land með pínulítið kúlutjald á Yarisnum hennar ömmu með veiðistöng og primus. Rómansinn í hámarki.“