Sala hefst á fyrstu rafknúnu flugferðunum

Skandinavíska flugfélagið SAS mun á morgun hefja sölu á farmiðum í fyrstu flugferðir sínar með rafknúnum flugvélum. 30 sæti verða í boði í fyrstu þremur flugferðunum en miðaeigendur munu hvorki vita hvaðan né hvenær þeir fljúga því flugvélarnar hafa ekki enn verið smíðaðar.

SAS áætlar að fyrstu rafknúnu flugvélarnar fari í loftið árið 2028. Þó er enn nokkur óvissa þar sem vélarnar eru enn á hönnunarstigi. Flugfélagið segist vera með mörg verkefni í gangi í átt að kolefnislausum flugferðum og enn á eftir að taka endanlega ákvörðun um hvernig flugvélar verði á endanum notaðar í fyrstu rafknúnu flugferðir félagsins.

Flugmiðana verður hægt að bóka á vefsíðu SAS og verða þeir seldir í gjaldmiðlum Noregs, Svíþjóðar og Danmerkur. Upphæðin er sú sama, 1.946 krónur, og óháð því hvort greitt sé í norskum, sænskum eða dönskum krónum. Er upphæðin valin til að minnast ársins sem SAS byrjaði að fljúga. Dagsetningar og staðsetningar flugferðanna verði tilkynntar með tölvupósti þegar ákvörðun hefur verið tekin.

• Blogga um frétt