Borgarferðum fylgir oft heldur hár verðmiði, enda fylgir þeim gjarnan mikil upplifun þar sem ferðalangar fá ævintýralega innsýn í menningu, sögu, arkitektúr og matarsenu svo eitthvað sé nefnt.
Hins vegar þurfa ferðalög í áhugaverðar borgir ekki að tæma bankareikninginn, en ferðavefur Condé Nast Traveller tók nýverið saman gögn úr rannsókn og birti yfirlit yfir ódýrustu borgarferðir Evrópu í sumar.
1. Lissabon í Portúgal
Höfuðborg Portúgals er ódýrasta evrópska borgin fyrir sumarið 2023 þökk sé girnilegri matarsenu á viðráðanlegu verði, ódýrum samgöngum og síðast en ekki síst – ódýrum bjór!
2. Vilníus í Litháen
Því næst er það Vilníus, höfuðborg og stærsta borg Litháens. Þar er ýmislegt að gera og sjá, þar á meðal má nefna nútímalistasafnið MO, gönguferðir um gamla bæinn og ferðir í loftbelg.
3. Kraków í Póllandi
Kraków er önnur stærsta borg Póllands, en hún er í suðurhluta landsins við ána Vislu. Þar er milt hitastig yfir sumarmánuðina, en meðalhitinn er um 18,5°C.
4. Aþena í Grikklandi
Fjórða ódýrasta borgarferðin er til Aþenu í Grikklandi. Hótel í Aþenu þykja sérlega góð og á viðráðanlegu verði.
5. Riga í Lettlandi
Næst á listanum er Riga í Lettlandi, en þar geta ferðalangar upplifað girnilega en ódýra matarsenu, magnaðan arkitektúr og áhugaverða sögu.
6. Portó í Portúgal
Portó er önnur stærsta borg Portúgals, staðsett í norðurhluta landsins við bakka Douro-árinnar. Þar geta ferðalangar upplifað hina fullkomnu blöndu af strand- og borgarferð.