Beðið hafði verið eftir því með mikilli eftirvæntingu hvort Meghan hertogynja af Sussex léti sjá sig á Invictus-leikjunum í Þýskalandi. Lítið hefur sést til hjónanna saman að undanförnu og hávær orðrómur um að þau eigi við erfiðleika að etja í hjónabandinu. Meghan hefur að mestu haldið sig í Kaliforníu á meðan Harry ferðast um heiminn og sinnt góðgerðastörfum.

Nú er Meghan hins vegar mætt til Þýskalands og virðast hjónin alsæl saman á leikjunum sem fara fram í Dusseldorf þessa dagana.

Meghan hélt óundirbúna ræðu í hófi á vegum leikjanna þar sem hún baðst afsökunar á að mæta seint til leikjanna. En hún sagðist hafa misst af fyrstu dögunum þar sem hún þurfti að sinna börnunum sínum, Archie og Lilibet sem eru 4 og 2 ára. Hún hafi meðal annars farið með eldra barnið í skólann og svo keypt handa þeim mjólkurhristinga áður en hún loks fór af landi brott.

„Ég biðst afsökunar á því að vera sein í veisluna. Ég bara þurfti að verja aðeins meiri tíma heima og koma börnunum vel fyrir, kaupa mjólkurhristinga, skutla í skólann,“ sagði Meghan í ræðu sinni sem hún hélt blaðlaust. Þá sagðist hún stolt af samfélaginu sem einkennir leikana og vill taka börnin með á leikana í framtíðinni svo þau geti upplifað þann sérstaka anda sem þar ríkir.