Það var mikil eftirvænting í loftinu í Flugstöð Leifs Eiríkssonar í morgun þegar flugfélagið PLAY fór í sitt fyrsta áætlunarflug til tyrknesku borgarinnar Antalya, en þetta er í fyrsta sinn sem áætlunarflug verður á milli Íslands og Tyrklands. PLAY mun fljúga einu sinni í viku til Antalya frá apríl til júní og svo aftur frá september til nóvember í haust.

Antalya býður upp á heillandi blöndu af sögu, menningu og náttúru, sem gerir borgina að einum af aðaláfangastöðunum við Miðjarðarhafið. Það sem mun vafalaust draga Íslendinga að borginni er úrval golfvalla á svæðinu, sem eru margir hverjir á heimsmælikvarða.

Auk Antalya fór PLAY í sitt fyrsta flug til portúgölsku borgarinnar Faro um liðna helgi. PLAY mun fljúga tvisvar í viku til Faro til loka október. Faro er höfuðborg Algarve-héraðs og er flugvöllurinn í um 15 mínútna fjarlægð frá miðborginni ef fólk ferðast með bifreið. Í Algarve-héraðinu má finna mikið úrval af sólarströndum og golfvöllum, auk allra þeirra þæginda sem fylgja sólarlandaáfangastöðum.

„Það er leitun að annarri eins sólarlandaáætlun og þeirri sem PLAY býður upp á þetta árið. Við höfum alltaf gefið út að við viljum vera leiðandi í þessum ferðum fyrir Íslendinga, og eru Antalya og Faro frábærar viðbætur við okkar kerfi. Við finnum fyrir miklum áhuga Íslendinga á þessum stöðum og ég er sannfærður um að okkar farþegar munu eiga góðar stundir þar,” segir Einar Örn Ólafsson, forstjóri PLAY.