Nýbakaðir stúdentar flykkjast suður á bóginn í sólina til að fagna útskrift. Albufeira, hinn líflegi strandbær í Portúgal, trónir á toppnum sem vinsælasti ­áfangastaður útskriftarnema í ár.

Ferðavefur mbl.is hefur tekið saman fimm skotheld ráð fyrir þessa ungu krakka sem margir hverjir eru á leiðinni í sína fyrstu ferð án fjölskyldu. 

Hvað skal gera og hvað skal forðast:

1. Forðastu að játa 10 ára ást þína - nema þú sért alveg viss.
   Heppilegur tími ástarjátningar er ekki þegar þið eruð föst á sama hótelganginum í viku. Reyndu að sjá hvort tilfinningarnar séu gagnkvæmar áður en þú skapar óþægilega stemningu sem enginn kemst undan.
   
   
2. Vinakerfið er heilagt.
   Farið alltaf að minnsta kosti tvö saman, hvort sem það er á ströndina eða ferð á salernið. Hafið kveikt á staðsetningu í símanum, t.d. með forritinu Life360.
   Svo gerir ekkert gagn af því að vera með síma ef rafhlaðan er búin. Fjárfestu í hleðslukubbi!
   
   
3. Ekki vera subban í hópnum.
   Spennan og skemmtunin þýðir ekki að her­bergið eigi að líta út eins og unglingsherbergi sem hefur ekki gengið frá í margar vikur. Gríptu með þér poka fyrir óhrein föt og losaðu þig við pizzakassana. Svo nennir líka enginn að horfa á skítugu sokkana þína liggja á gólfinu.
   
   
4. Berðu virðingu fyrir hlutum annarra.
   Brotin hurð, skemmd borðplata eða önnur „óhöpp“ geta kostað hópinn hóteltrygginguna - sem getur reynst vont fyrir veskið. Athugaðu reglur hótelsins og mundu að tryggingar dekka ekki fíflagang sem fer úr böndunum.
   
   
5. Passaðu mikilvæga hluti.
   Geymdu vegabréf, kort og reiðufé í öryggishólfi eða á öðrum góðum stað. Taktu mynd af skilríkjunum á símann og notaðu snertilausar greiðslur þegar farið er út á lífið. Það væri leiðinlegt að verða viðskila við vegabréfið og átta sig á því á leiðinni heim.
   
   

mbl.is óskar nýstúdentum góðrar ferðar og minnir á mikilvægi þess að innbyrða nóg af steinefnum og söltum í hitanum, setja á sig sólarvörn og ekki gleyma góða skapinu. Verið góð hvert við annað og komið heil heim. Góða skemmtun!

Tengdar fréttir

Ferðaráð

Laugavegurinn á ævintýralista The Guardian

• Leynibærinn í Sviss sem þú þarft að heimsækja
• Fimm æðislegar borgir í sumarfríinu
• Norðurland: Kroppurinn á skilið góða slökun
• Hendir öllu á svefnherbergisgólfið fyrir ferðalagið

» Fleiri tengdar fréttir

• Blogga um frétt