Gistu í húsi Yves Saint Laurent í Marokkó

Hafnarborgin Tangier er staðsett í norðvesturhluta Marokkó. Borgin þykir heldur rólegri en Marrakesh og það er líklega ástæðan fyrir því að fatahönnuðurinn Yves Saint Laurent varði svo miklum tíma í dásamlegu húsi við sjóinn í Tangier. Nú hefur húsinu verið breytt í lítið tólf herbergja hótel. 

Hótelið heitir Villa Mabrouka sem má þýða sem Hús heppninnar. Húsið notuðu þeir Saint Laurent og lífsförunautur hans, Pierre Bergé, til að flýja streituna sem fylgdi lífi þeirra í París. 

Breski hönnuðurinn Jasper Conrad gerði hótelið upp með sjálfan Saint Laurent í huga. Hótelið er hið glæsilegasta og fegurð í öllum hornum. 

„Saint Laurent vildi að húsið myndi endurspegla glæsileika æsku sinnar í Oran,“ sagði Conran í viðtali hjá arabíska Vogue. 

„Það er glæsilegt í hreinleika sínum og einfaldleika. Þetta er ekki marokkósk höll heldur miðjarðarhafshús með blíðum blæbrigðum Marokkó. Friðsæl stund á milli stríða.“

Saint Laurent fæddist í Oran í Algeríu árið 1936. Hann heillaðist af Norður-Afríku aftur á fullorðinsárum og varð hugfanginn af litunum og birtunni. Marokkó varð honum stanslaus innblástur.