Ferðalög | Ferðalög erlendis | mbl | 6.10.2025 | 8:00

Ævintýraleg mótel í anda sjöunda áratugarins

Mótelin eru mörg hver spennandi og ævintýraleg þar sem gestir geta ferðast marga áratugi aftur. Samsett mynd/Instagram

„Klassi“ er eflaust ekki fyrsta orðið sem kemur upp í hugann þegar hugsað er um gistingu á vegahóteli, eða móteli, eins og þekkist t.d. víða um Bandaríkin. Tilhugsunin um að dvelja ofan í þjóðveginum er ekki beinlínis spennandi og kannski sérstaklega vegna þess hve mótel hafa oft verið notuð sem sögusvið í glæpa- og hryllingsmyndum.

Hins vegar er vel hægt að finna sjarmerandi og gamaldags mótel á ýmsum stöðum í Bandaríkjunum sem eru vel þess virði að prófa.

The Dive í Nashville, Texas

Mótelið er ansi litríkt og einungis ætlað fullorðnum. Mótelið er innréttað í anda sjöunda og áttunda áratugarins og tekur dvölin gesti marga áratugi aftur í tímann.

The Dive í Nashville. Skjáskot/Instagram

Trixie mótel í Palm Springs, Kaliforníu

Mótelið er innblásið af engri annarri en Barbie og rekið af dragdrottningunni Trixie Mattel. Bleiki liturinn er allsráðandi hvert sem litið er. Mótelið er einungis fyrir fullorðna.

Barbie-hótelið Trixie í Palm Springs. Skjáskot/Instagram

The Pearl í Point Loma, Kaliforníu

Hótelið var upphaflega teiknað af arkitektinum Robert Platt, árið 1959. Síðan þá hafa verið gerðar endurbætur að innanverðu og er hótelið innréttað í blöndu af gamaldags- og nútímastíl, með listmunum gerðum af heimamönnum.

The Pearl er skreytt með listmunum gerðum af heimamönnum. Skjáskot/Instagram

Lucine í Galveston, Texas

Mótelið opnaði fyrst árið 1963, þá sem lúxushótel. Það hefur verið endurbætt síðan þá og haldið hefur verið í það gamla til „að varðveita sálina“.

Það er vel hægt að slaka á við sundlaugarbakkann á Lucine í Galveston. Skjáskot/Instagram

Madonna Inn í San Luis Obispo, Kaliforníu

Madonna Inn opnaði fyrst 1958 og er þekkt fyrir litríkt umhverfi, miklar skreytingar og vel af bleika litnum. Hótelið er ætlað fjölskyldum sem og fyrir rómantískar paraferðir.

Bleiki silfurbarinn á Madonnu Inn. Skjáskot/Instagram

Ace Hotel & Swim Club í Palm Springs, Kaliforníu

Ace Hotel er einn vinsælasti áfangastaðurinn í héraðinu. Umhverfið er allt í senn einfalt og minnir helst á bóhem-stíl. Í garðinum eru tvær stórar sundlaugar, kokteilbar og veitingastaður.