Snapp og Google sem kennslutæki

Í tímariti Kennarasambands Íslands, Skólavörðunni, er fjallað um starf menntabúða Eymenntar í Dalvíkurskóla í lok mars sl. sem hafa verið starfræktar sex sinnum í vetur.

„Að menntabúðunum Eymennt standa sex grunnskólar í Eyjafirði og þær hafa verið starfræktar í tvo vetur. Upphafið má rekja til þess að við kynntumst fyrirkomulagi slíkra menntabúða á Samspili, þar sem þátttakendur deila eigin þekkingu og reynslu til annarra kennara sem sækja búðirnar,“ segja þær Ingileif Ástvaldsdóttir, skólastjóri Þelamerkurskóla, og Katrín Fjóla Guðmundsdóttir, deildarstjóri Dalvíkurskóla í viðtali við Karl Eskil Pálsson.

 „Hingað mætir fólk af sjálfsdáðum eftir hefðbundinn vinnudag og bætir við sig þekkingu. Þetta er allt saman meira og minna sjálfsprottið og að okkar mati er þetta frábær vettvangur til að stuðla að auknu upplýsingaflæði meðal kennara, tengslamyndun og starfsþróun. Við leitum til kennara um að kynna verkefni, auk þess se mmargir bjóðast að fyrra bragði til að halda kynningu á einhverri nýjung í kennsluháttum sem hefur gefist vel. Við vitum til þess að tengsl á milli kennara og sömuleiðis skóla hafa aukist, þannig að við erum afskaplega ánægðar með árangurinn,“ segja þær Ingileif og Katrín Fjóla.

Margrét Þóra Einarsdóttir og Fjóla Dögg Gunnarsdóttir nota snapp í kennslunni með góðum árangri. Mbl.is/Karl Eskil Pálsson

Menntabúðirnar sem haldnar voru í Dalvíkurskóla voru vel sóttar. Sex grunnskólar í Eyjafirði standa að Eymennt, en starfsfólki allra skóla er velkomið að sækja búðirnar. Í þetta skipti var kastljósinu sérstaklega beint að rafrænum kennsluháttum, m.a. hvernig nota megi snapp í skólastarfinu.

Snappið opnar á umræður

Margrét Þóra Einarsdóttir og Fjóla Dögg Gunnarsdóttir úr Brekkuskóla voru með kynninguna. Margrét Þóra kennir dönsku og Fjóla Dögg samfélagsfræði. „Í samfélagsfræði er mikilvægt að spjalla sem mest. Bekkurinn minn er nokkuð erfiður hvað það varðar og erfitt að ná þeim í umræður þannig að ég íhugaði leiðir til þess að bæta úr því. Mér datt í hug að láta nemendur nota snappið til að leysa ýmis verkefni, svo sem að túlka ýmis hugtök með því að senda mynd á snappinu með viðeigandi texta. Viðbrögðin voru strax afskaplega jákvæð, enda eru krakkarnir flestir nokkuð sleipir í þessu forriti og nota það mikið í samskiptum sín á milli,“ segir Fjóla Dögg. Nemandi Margrétar Þóru kom að máli við hana einn daginn og spurði um möguleikann á því að nota snapp í dönskunni.

„Ég svaraði strax játandi og spurði hvernig við ættum að gera það. Þessi nemandi opnaði síðan reikning á snappinu og boltinn fór fljótlega að rúlla. Krakkarnir senda mér og samnemendum sínum snapp og lykilatriðið er að tala og skrifa dönsku. Hver og einn er með dönskusnappið í einn dag og snappar þá af lífi og sál og útkoman er oft á tíðum afskaplega frumleg og skemmtileg. Undirbúningurinn getur orðið ansi mikill, enda leggja sumir mikið á sig til þess að gera snappið sem skemmtilegast.“

Rafrænir kennsluhættir að ryðja sér til rúms

Svalur kennari Þær Fjóla Dögg og Margrét Þóra eru sammála um snappið hafi gefið góða raun sem hjálpartæki í kennslunni. „Krökkunum finnst þetta skemmtilegt og spennandi og ræða þetta mikið sín á milli. Þá er tilganginum náð. Mér finnst þetta frábær viðbót, rafrænir kennsluhættir eru að ryðja sér til rúms og koma til með að aukast í framtíðinni, auk þess sem margir kennarar eru afskaplega áhugasamir,“ segir Margrét Þóra.

„Krakkarnir þurftu að kenna mér ýmislegt í snappinu, sem var allt í lagi og hið besta mál. Þeim fannst kennarinn jafnvel vera svolítið svalur með því að nota snappið sem kennslutæki og ekki dró úr ánægjunni að mega segja kennaranum til í þessum efnum,“ segir Margrét Þóra.

Báðar segja þær að kennarar sýni rafrænum kennsluháttum aukinn áhuga. „Líklega langar flesta kennara til að vera virkir í þessum efnum. Eitt skrefið er að sækja hugmyndasmiðjur á borð við Eymennt. Síðan er um að gera að tala saman, hugmyndirnar koma venjulega á færibandi, enda möguleikarnir óteljandi.“

Rafrænir kennsluhættir eru að ryðja sér til rúms (myndin er úr myndabanka).

Friðrik Arnarson, deildarstjóri Dalvíkurskóla, notaði  á spurningaleik út frá Google Maps og Google Street View. „Á Google er að finna forrit sem heitir GeoGuessr og þar er hægt að fara í spurningaleiki. Þátttakendur þurfa að svara því hvar í heiminum myndin sem birtist á skjánum er tekin. Ég hef nýtt mér þennan leik á unglingastigi, tók fyrstu skrefin snemma á þessu ári. Ég sótti Google ráðstefnu í Reykjavík, þar sem sýndir voru ýmsir möguleikar. Þessi námsleikur getur verið hagkvæmur sem uppfylling í tíma,  eða ef brjóta þarf upp starfið í kennslustofunni. Í þessum leikjum er hægt að fara margar leiðir, til dæmis að finna fræga staði, vinsæla ferðamannastaði eða jafnvel þekkta íþróttaleikvanga, svo dæmi séu tekin,“ segir Friðrik.

Möguleikarnir óþrjótandi

Hann segir að nemendur læri auk þess að nýta sér ýmsa samfélagsmiðla við leit aðrétta svarinu. Möguleikarnir séu óþrjótandi. „Við þurfum bara að koma auga ánýja möguleika og tækifæri í kennslu og þá er um að gera að leita sér aðstoðar, til æmis með því að sækja námskeið eða kynna sér hvað aðrir kennarar eru að gera. Nemendurnir eru afskaplega áhugasamir um þetta allt saman og svona lagað lífgar upp á lífið og tilveruna. Allir kennarar vilja bæta sig og fjölga verkfærum í kistunni sinni. Ég býst við að grípa til þessara leikja næsta vetur og vonandi hef ég lært eitthvað nýtt í millitíðinni,“ segir Friðrik Arnarson, deildarstjóri Dalvíkurskóla.

Grein Karls Eskils á vefútgáfu Skólavörðunnar

• Blogga um frétt