Á von á barni á sextugsaldri
/frimg/1/8/87/1088727.jpg)
Bandaríski leikarinn Josh Duhamel á von á barni með eiginkonu sinni, Audru Mari. Duhamel, sem er fæddur árið 1972, kvæntist hinni 29 ára gömlu Mari í september á síðasta ári og fögnuðu hjónin eins árs brúðkaupsafmæli sínu á dögunum.
Duhamel og Mari tilkynntu óléttuna með fallegri færslu á Instagram í gær, daginn eftir eins árs brúðkaupsafmæli hjónanna.
„Duhamel-barn væntanlegt á næstunni,” skrifaði parið við færsluna sem sýnir tvær sónarmyndir og útsprungið blóm.
Heillaóskum hefur rignt yfir hjónin, en fyrrverandi eiginkona og barnsmóðir Duhamel, söngkonan Fergie, var með þeim fyrstu til að óska hjónunum innilega til hamingju.
„Ég er virkilega ánægð fyrir ykkar hönd. Axl getur ekki beðið eftir því að verða stóri bróðir,” skrifaði söngkonan. Fergie og Duhamel voru gift á árunum 2009-2019 og eiga einn son sem er 10 ára gamall.
