TheVikingBay.org: Rukka 600.000 fyrir ólöglegt niðurhal

Caoz hf. hefur farið fram á það við aðstandendur deilisíðurnar Thevikingbay.org að þeir greiði Caoz 608.940 krónur fyrir ólöglegt niðurhal á myndinni Anna og skapsveiflurnar sem er birt á deilisíðunni.

Samkvæmt bréfi Caoz hefur myndinni verið hlaðið niður 306 sinnum en bréfið er hægt að sjá í heild sinni, sem og svar talsmanns thevikingbay, á deilisíðunni. Aðstandendur Viking Bay hafa 30 daga til að greiða upphæðina ella fer málið í innheimtu.

Munu ekki borga krónu

Unnar Geir Ægisson, talsmaður Viking Bay, segir að ekki komi til greina að borga umrædda upphæð eða þá að fjarlægja myndina af síðunni. „Við lítum á þetta mál í svolítið öðru ljósi en svona fólk. Þetta er framtíðin,“ segir Unnar og vísar þá til skráaskiptaforrita sem leyfa notendum að skiptast á höfundarréttarvörðu efni.

Hann segir að það hafi einu sinni gerst að efni hafi verið fjarlægt af Viking Bay en þá hafi það verið vegna mistaka stjórnanda.

Hafa fengið líflátshótanir

Unnar segir að síðunni berist hótunarbréf mjög reglulega og oft sé hótað fleiru heldur en bara málsóknum og skaðabótum. „Fólk hefur hótað að berja okkur og drepa okkur og hvaðeina.“

Hann segir að það hafi alveg komið fyrir að þeir sem hafi haft í þessum hótunum hafi verið listamenn sem eiga efni inni á síðunni. Unnar vill þó ekki nafngreina þessa aðila. „Við verðum að virða alla og viljum ekki skemma mannorð listamanna.“

Í hnotskurn
Síðan varð til eftir að hin fræga istorrent lagði upp laupana. Á meðal íslensks efnis á síðunni er sjónvarpsþáttaröðin Pressa, Næturvaktin og nýjasti diskur Páls Óskars, Allt fyrir ástina.
mbl.is

Bloggað um fréttina