Ófáir hafa talið sig sjá þriðja ísbjörninn þótt enn hafi aðeins fengist staðfesting á komu tveggja slíkra í sumar. En sá þriðji verður loks opinberaður í haust í nýrri barnabók Þorgríms Þráinssonar, Þriðji ísbjörninn.
Í bókinni rænir téður björn nesti ungra barna, sem snúa á bangsa með því að lokka hann inn í hjólhýsi og loka hann þar inni. Hjólhýsið er svo fararskjóti bjarnarins suður í höfuðborgina þar sem Reykvíkingar fá loksins ísbjörn í heimsókn sjálfir.
Á ísbjarnarslóðum í sumar
„Ég var á ísbjarnarslóðum þegar báðir ísbirnirnir komu á land,“ segir Þorgrímur um kveikju skrifanna, en hann var staddur á Skagaströnd að vinna að kvikmyndahandriti. Í bókinni deilir hann nokkuð á þá hysteríu sem fyrri ísbirnir sumarsins ollu. „Á meðan allir eru að tala um bangsa litla og verndunarsjónarmið birtist allt í einu ísbjörn í Reykjavík og þá er þetta kannski ekki jafn sætur bangsi og margir vilja vera láta,“ segir Þorgrímur sem er að vinna að sérverkefnum fyrir heilbrigðisráðherra núna en stefnir á áframhaldandi skrif eftir það.