Björk Guðmundsdóttir stendur fyrir þriggja daga karókímaraþoni í Norræna húsinu á þrettándanum.
Tilefnið er undirskriftasöfnun sem fram fer á orkuaudlindir.is, þar sem skorað er á stjórnvöld að sjá til þess að náttúruauðlindir landsins verði áfram í eigu þjóðarinnar, að því er fram kemur í Morgunblaðinu í dag.
„Ég er að gefa boltann yfir á þjóðina. Þetta eru lokaskrefin í þessari syrpu minni sem hófst með Náttúrutónleikunum í Laugardal fyrir tveimur árum þar sem ég söng fyrir þjóðina. Nú er komið að henni. Ég vil líka setja smá stuð í þetta. Þetta getur líka verið gaman, það þarf ekki að rexa og pexa út í eitt,“ segir söngkonan meðal annars í samtalinu.