Leikstjórar túlka tónlist Sigur Rósar

Hljómsveitin Sigur Rós hefur fengið 12 kvikmyndagerðarmenn til að búa til stuttmyndir við tónlistina sem er að finna á nýjustu breiðskífu sveitarinnar, sem nefnist Valtari. Markmiðið er að bregða út af vananum við gerð tónlistarmyndbanda og fá leikstjórarnir algjört frelsi til að vinna að sinni sköpun, að því er segir í tilkynningu frá sveitinni.

Georg Hólm, bassaleikari Sigur Rósar, segir að hljómsveitin vilji ekki segja öðrum hvernig þeim eigi að líða eða hvernig fólk eigi að skilja tónlistina. „Við höfum ekki hugmynd um hvað leikstjórarnir munu koma með. Enginn þeirra veit hvað hinir eru að gera; þetta gæti því orðið forvitnilegt,“ segir Georg.

Fyrsta myndin var frumsýnd á heimasíðu Sigur Rósar í dag. Hún er við lagið „Ég anda“ og er eftir Ragnar Kjartansson.

Stefnt er að því að frumsýna næstu mynd 4. júní nk. og áfram á hálfsmánaðar fresti í allt sumar.

Aðrir sem taka þátt í verkefninu eru þau Nick Abrahams, Árni & Kinski, Ramin Bahrani, Melika Bass, Inga Birgisdóttir, Alma Har'el, Sarah Hopper, Clare Langan, Henry Jun Wah Lee, Ryan McGinley og John Cameron Mitchell & Dash Shaw.

• Blogga um frétt