Tökur hefjast við Mývatn á mánudag
Tökur á kvikmynd Tom Cruise, Oblivion, hefjast við Mývatn á mánudag, samkvæmt heimildum mbl.is. Leikmynd og vinnubúðir hafa verið settar upp við gíginn Hrossaborg í Mývatnssveit. Síðar í mánuðinum fara tökur fram við Drekavatn á Jökulheimaleið. Þar hefur einnig verið komið upp leikmynd og búðum fyrir kvikmyndatökuhópinn. Áætlað er að tökum þar ljúki þar í byrjun júlí.
Hluti þess teymis sem hingað kemur til að vinna við myndina mun dvelja á hótelum á hálendi Íslands og í gistingu við Mývatn meðan á tökum stendur.
Tom Cruise kom ásamt fjölskyldu sinni til Íslands á einkaþotu í morgun. Dvelur hann á Hilton hótel Nordica, a.m.k. fyrst í stað. Hann mun skoða tökustaði myndarinnar í dag og á morgun en ætlar að taka því rólega með fjölskyldunni á sunnudag, en þá er feðradagurinn.
Í sendiför á fjarlæga plánetu
Handrit myndarinnar Oblivion byggist á samnefndri teiknimyndasögum eftir Joseph Kosinski og Arvid Nelson en handritshöfundur myndarinnar er William Monahan. Myndin á að gerast í framtíðinni og fjallar um fyrrverandi hermann sem er sendur á fjarlæga plánetu til að gera út af við kynstofn geimvera sem þar búa. En hann er ekki eini maðurinn á plánetunni og eftir komuna þangað fer hann að velta fyrir sér tilgangi ferðarinnar, sín sjálfs og lífsins.
Meðal þeirra sem fara með hlutverk í myndinni, auk Tom Cruise, eru Morgan Freeman og Andrea Riseborough.
Joseph Kosinski leikstýrir myndinni og samkvæmt kvikmyndavefnum IMDB er þetta önnur kvikmyndin sem hann leikstýrir.
