Heimsklassa origami í Gerðubergi

Á dögunum var opnuð sýningin Origami: brot í brot, í Gerðubergi. Þar má sjá origami-verk eftir hjónin Dave og Assiu Brill en þau halda jafnframt námskeið í listinni um næstu helgi. Grunnreglur listformsins, sem upprunalega er frá Japan, eru þær að aðeins má brjóta pappírinn en hvorki klippa né líma.

Þau hafa hannað fjölda bréfbrota, gefið út bækur, fengist við kennslu og sýnt verk sín víða um heim. Hestar, flóðhestar, ljón, gíraffar, kettir og mýs auk blóma, vasa, engla, stjarna, kassa og kubba eru meðal þess sem sjá má á sýningunni. Þar eru einnig þekktustu verk þeirra svo sem Saint George and the Dragon eftir Dave og St. Basil á Rauða torginu í Moskvu eftir Assiu. 

mbl.is