Hin íslenska Ása Ástardóttir er þátttakandi í hinum þýsku raunveruleikaþáttum Big Brother. Í gær flutti hún inn í húsið með hinum þátttakendunum þar sem hún mun búa næstu þrjá mánuði, ef vel gengur.
Þættirnir á eru byggðir á skáldsögu George Orwell, 1984, en í þeim er hópur fólks látinn búa saman í húsi þar sem fylgst er með þeim öllum stundum. Þátttakendur fá litlar fréttir af umheiminum á meðan dvöl þeirra stendur. Í viku hverri er einn þátttakandi sendur heim, en sigurvegari þáttanna fær að launum 100.000 Evrur.
Þættirnir eru sýndir á þýsku stöðinni Sixx, en Ása virðist nú þegar vera farin að vekja mikla eftirtekt fyrir sérkennilega siði, líkt og álfatrú.
Ása segir það mikinn heiður að hafa verið valin í þættina, en hún vonast til að geta kynnt þýska áhorfendur fyrir íslenskri menningu. Hún segist jafnframt vongóð um að standa uppi sem sigurvegari þáttanna.