Sjálfsagt hjá Ágústu að ganga út

Gísli Marteinn Baldursson, þáttastjórnandi Vikunnar segir það sjálfsagt mál hjá Ágústu Evu Erlendsdóttur að hafa gengið út af atriði Reykjavíkurdætra í þættinum á föstudaginn og spyr hvort að útkoman sjálf hafi hugsanlega verið stuðandi gjörningur, rétt eins og atriði sveitarinnar.

Málið hefur vakið mikla athygli en Reykjavíkurdætur fluttu lagið Ógeðsleg í þættinum, klæddar í sjúkrahúsklæðnað og var ein þeirra með gervilim eða svokallað „strap-on“.

Þegar að lítið var eftir af laginu gekk Ágústa Eva út og sagði síðar á Facebook að hún hefði aldrei skammast sín eins mikið og meðan á flutningi Reykjavíkurdætra stóð. Sagðist hún jafnframt aldrei hafa orðið vitni af því­líkri „drullu og yf­ir­gangi og ósmekk­leg­heit­um“.

Fyrri fréttir mbl.is: Gísli Marteinn í báðum liðum

Fyrri frétt mbl.is: „Aldrei skammast mín jafn mikið“

Gísli Marteinn hefur nú tjáð sig um málið á Facebook. Þar segir hann sjálfsagt hjá Ágústu Evu að hafa gengið út ef henni hafi liðið illa undir „stuðandi atriði“ sveitarinnar.

„Atriði Reykjavíkurdætra er hinsvegar ágætur fulltrúi í langri sögu umdeildra tónlistaratriða á Rúv, þar sem ýmsir betri borgarar hafa móðgast ofan í tær. Blómaland Megasar snemma á áttunda áratugnum, Poppstjarna Bubba sem gaf áhorfendum fokkmerki 1981, Kuklið þar sem Björk var með óléttubumbu út í loftið 1986. Nær okkur í tíma hafa Mínus, Rottweilerhundar og hið stórkostlega listaverk Silvía Nótt hneykslað - hvert á sinn hátt,“ skrifar Gísli Marteinn og bætir við að á meðan fólk hafi fullan rétt á því að hneykslast væri saga okkar fátækari ef „þessi hneykslanlegu atriði hefðu ekki fengið að sjást.“

Færslu Gísla Marteins í heild sinni má sjá hér að neðan.

Reykjavíkurdætur á Iceland Airwaves í fyrra. mbl.is/Eggert Jóhannesson

• 2 blogg um fréttina

Bloggað um fréttina

• Jóhann Elíasson: ER EKKERT EFTIRLIT HAFT MEÐ ÞVÍ SEM FER Í LOFTIÐ??????
• Ómar Ragnarsson: Er og verður alltaf einhver lína.