„Fanboy-inn í mér er alveg að springa, hann er eiginlega sprunginn og sprakk fyrir viku,“ segir Arnór Dan Arnarson, söngvari hljómsveitarinnar Agent Fresco. Sveitin mun spila á Valhalla-sviðinu klukkan 21:00 í kvöld á tónlistarhátíðinni Secret Solstice en næst á eftir þeim mun hljómsveitin Deftones stíga á stokk.
„Það er mjög gaman að fá að spila á undan þeim. Þetta er hljómsveit sem hefur haft gríðarlega mikil áhrif á mig. Ég held að það sjáist líka á mér sem performer að Chino Moreno hefur haft gríðarleg áhrif á mig,“ segir Arnór.
Hann er ánægður með Secret Solstice-tónlistarhátíðina og segir hana akkúrat það sem vantaði hér á landi. „Það vantaði svo mikið eina hátíð í bænum með svona fjölbreytta dagskrá og svo er íslenska senan líka svo vel kynnt.“
Agent Fresco munu koma fram á nokkrum tónlistarhátíðum á Íslandi í sumar en fram undan hjá þeim er tveggja vikna tónleikaferðalag í ágúst og september.