Suðurafríska rappsveitin Die Antwoord mun koma fram á Secret Solstice-tónlistarhátíðinni klukkan 23:00 í kvöld innan í Hel.
Dyrnar opna klukkan 22:30 en á sjöunda tímanum í kvöld hafði strax myndast biðröð fyrir utan Laugardalshöllina. Hvetja skipuleggjendur hátíðarinnar því alla áhugasama að mæta tímanlega í röðina.
„Eins og áður hefur komið fram þá þurfti að seinka tónleikum sveitarinnar vegna aðstæðna sem aðstandendur Secret Solstice réðu ekki við en miklar seinkanir hafa verið á millilandaflugi til
Keflavíkur í dag vegna forfalla hjá flugumferðarstjórum,“ segir í fréttatilkynningu frá skipuleggjendunum.
Nokkrar breytingar á dagskránni voru nauðsynlegar til þess að láta nýjan tíma rappsveitarinnar
ganga upp. Plötusnúðurinn Apollonia hefur verið færður í danstjaldið Ask klukkan 23:00 og
plötusnúðarnir Stephane Ghenacia og Voyeur hafa verið færðir þar til síðar um nóttina í Hel. Kerri
Chandler kemur fram klukkan 00:30 eftir að Die Antwoord hafa klárað sína tónleika.
Breski plötusnúðurinn Artwork kemur fram klukkan 18:50 á stærsta sviði hátíðarinnar Valhalla, á sama tíma og Die Antwoord áttu að koma fram.